by: Simplicio Solis

(The Author is a retired Head Teacher of the Bureau of Public Schools (now Department of Education) after 40 years of government service. After retirement, he ran for public office and won a seat in the Municipal Council, Villareal, Samar for three (3) consecutive terms (1992-2001). He is also a 4th Degree member of the Knights of columbus, Villareal Council 5847.)

May gin mamahal ko nga usa nga bungto
Bungto Villareal nga natawhan ko
Katundan han Samar an iya hinmotangan
“Real village” ha English, matahum nga ngaran

Igin paparayaw ko it Villa ha iyo
May naturalisa nga kinaiya hine nga ak bungto
May ada panayoran higluag nga taramnan
Hiluag nga kadagatan hora hin kaisdaan.

May ada kahagnaan nga it Villa ginpalibutan
May mga hagna ha timogan ug dapit sinirangan
May ada ha amihanan sugad man ha katundan
Taramnan hiya hin mga homay kanan parag-uma kahuraan

Ako naglalaum it Villa ma asenso
Dire mapaorhi hit iba nga bungto
Kay hi Mayor boy Latorre buhatan maduruto
Buotan ug tangkud hit iya serbisyo.

May ada mga bus para Catbalogan Tacloban
May dako nga motorboat para kadagatan
May ada ha Manila mga pansarakyan
Kanan taga Villa gintatag-iyahan.

Para ha Manila di kana magkokori
Kay kada semana it ira biyahe
Lunes ug Huybes, Miyerkoles ug Sabado
Di ka na magkokori, barato pa it pasahi.

Hingangandayan ko naman parte pag aradman
May gobierno ug pribado, High School nga kakadtuan
May Barangay High Schools kumpleto hin kagamitan
Waray nagud iiliwon hit mga nag aaram.

May mga produkto hin mga liburan
Mga professionals nga mga bantugan
Mga ahensiya han gobierno, pribado ginpangaptan
Higtaas nga posisyon, hira gintaporan.

Idinadasig ko ine nga ak bungto
Kay nagkakaurosa mga taghimongto
Waray mga krimen pagperde hin tawo
Kay an panuyo gudla bungto umasenso.

Yana nga panahon it Villa tikadto
Pag-gios, paguswag hin ka progresibo
Hi Mayor Latorre may ada proyekto
Bayanihan nga kalsada hiya’n nagmangulo.

Ine nga kalsada tikadto ha Kasang-an
Gin ngaranan ine “Kalsada Bayanihan”
Mga taghimunghto pati baryo
Gin buburubligan ine para la mahimo.

Mga Villahanon ha iba nga nasyon
Dagko nga kantidad an ira donasyon
Kay ira panuyo kalsada humanon
Para masayon na it at transportasyon.

Bungto Villareal hi ikaw palaran
An mga anak mo di ka ginpabay-an
Ha mga kasakit pati kakurian
Ngatanan burublig imo katalwasan.

An naturalisa ug kinaiya han bungto hit Villa
Puros ginpulsan in nga mga grasya
Hatag han Makagarahum pati ni Santa Rosa
Hiya man an amon Patrona ha Villa

Kami nagdadayaw an mga Villahanon
Kan Santa Rosa gugma ug bulig ha amon
Kadam-an nga grasya amon nakarawat
Salamat, Santa Rosa, Salamat! Salamat!